|
Poeta New Yorken GURUTZILTZAKETA Ilargia zaldien bihurgune oso zuriarengatik gelditu ahal izan zen azkenik. Zauritik ihes egiten zuen argi izpi bortitz batek hildako mutil koxkor baten erdainkuntzaren unea proiektatu zuen zeruan. Odola mendietatik jaisten ari zen eta aingeruak haren bila zebiltzan, baina kalizak haizezkoak ziren eta azkenean zapatak betetzen zituen. Zakur herrenak pipa erretzen ari ziren eta larru berozko min batek gris jartzen zituen kantoietan ok egiten zutenen ezpain biribilak. Eta marruma luzeak heltzen ziren gau idorraren Hegotik. Kontua zen ilargiak zaldien zakila erretzen zuela bere kandelekin. Purpuran espezializatutako jostun batek hiru emakume sainduak itxiak zituen eta kaskezur bat erakusten zien leihoko beiretatik zehar. Hiru haurrek errebalean egunsentian ezinbestean orratz baten zulotik iragan behar zuelako izututa negarrez ari zen gamelu zuri bat zuten inguratua. Oi gurutzea! Oi iltzeak! Oi arantza! Oi planetak herdoildu arte hezurrean iltzatutako arantza! Inork bururik biratzen ez zuenez, zerua biluztu ahal izan zen. Orduan ahots handia entzun zen eta fariseoek esan zuten: Behi madarikatu horrek esnez beteak ditu titiak. Jendetza ateak ixten ari zen eta euria kaleetatik jaisten bihotza bustitzera deliberaturik arratsaldea taupadez eta egurgilez uher jarri eta hiri iluna arotzen mailuaren azpian hilzorian zegoen bitartean. Behi madarikatu horrek perdigoiz beteak ditu titiak, esan zuten fariseo urdinek. Baina odolak haien oinak busti zituen eta espiritu satsuak aintzirazko anpuluak apurtzen ari ziren tenpluaren pareten kontra. Gure bizitzen salbazioaren une zehatza jakin zen ilargiak urez garbitu zituelako zaldien erredurak eta ez hondarrean isildu zuten neska koxkor bizia. Orduan hotzak irten ziren beren kantuak kantatzen eta igelek beren suak piztu zituzten ibaiaren ertz bikoitzean. Behi madarikatu horrrek, madarikatua, madarikatua, madarikatua, ez digu lo egiten utziko, esan zuten fariseoek, eta beren etxeetara urrundu ziren kaleko anabasan zehar mozkorrei bultzadak emanez eta sakrifizioetako gatza ttu eginez egotziz odola arkume balaka batez jarraikitzen zitzaien bitartean. Orduan izan zen eta lurra sitsezko ibai dardartiak egozten esnatu zen. Poeta New Yorken
|
