|
Poeta New Yorken LORIK GABEKO HIRIA (BROOKLYNG BRIDGEKO NOKTURNOA) Ez du inork lo egiten zeru aldean. Inork ez, inork ez. Ez du inork lo egiten. Ilargiko izakiek beren etxolak usaintzen eta zaintzen dituzte. Etorriko dira iguana biziak amets egiten ez duten gizonei kosk egitera eta bihotza hautsirik ihes egiten duenak krokodilo geldi sinestezina aurkituko du argizagien protesta samurraren azpian geldirik. Ez du inork lo egiten mundu aldean. Inork ez, inork ez. Ez du inork lo egiten. Hildako bat dago hilerririk urrunenean hiru urtez arranguratzen dena belaunean paisaia idor bat duelako; eta zakurrei deitu beharra izan da goizean lurperatu duten mutil koxkorra isil zedin, horrenbeste negar egiten zuen. Bizia ez da loa. Erne! Erne! Erne! Eskaileretan behera amiltzen gara lur hezea jateko edota elurraren sorbatzera igotzen dalia hilen koruarekin. Baina ez dago ahanzturarik, ezta lorik ere: haragi bizia. Musuek ahoak lotzen dituzte zain berrien nahaspilan eta bere minak min ematen dion hark etenik gabe izango du min eta haren beldur denak sorbalda gainean eramango du heriotza. Egun batez zaldiak tabernetan biziko dira eta inurri suminduek behien begietan babesten diren zeru hori kolorekoei eraso egingo diete. Beste egun batez tximeleta disekatuen berpizkundea ikusiko dugu eta belaki grisen eta itsasontzi mutuen paisaia batean ibiliagatik ere gure eraztuna dirdira egiten ikusiko dugu eta gure mihitik arrosak jariatzen. Erne! Erne! Erne! Oraindik ere erpe eta eurijasa arrastoak gordetzen dituztenak, zubiaren asmaketaren berri ez dakielako negar egiten duen mutikoa, edota dagoeneko burua eta zapata bat baino ez dituen hildako hura, iguanak eta sugeak zain dauden hormetara eraman behar dira, hartzaren hortzeria zain dagoen lekura, mutil koxkorraren esku momifikatua zain dagoen eta gameluaren larruazala hotzikara urdin bortitz batez kizkurtzen den lekura. Ez du inork lo egiten zeru aldean. Inork ez, inork ez. Ez du inork lo egiten. Baina inork begiak ixten baditu, zigor ezazue, semeok, zigor ezazue! Begi irekien eta zauri mingots irazekien panorama bat bego. Ez du inork lo egiten mundu aldean. Inork ez, inork ez. Esana dut. Ez du inork lo egiten. Baina inork gauean goroldio gehiegi baldin badu lokietan, ireki itzazue tranpolak ikus ditzan ilargiaren azpian kopa aizunak, pozoia eta antzokietako kaskezurra. Poeta New Yorken
|
