|
Poeta New Yorken PIXA EGITEN DUEN JENDETZAREN PAISAIA (BATTERY PLACEKO NOKTURNOA) Bakarrik geratu ziren. Azken bizikleten abiaduraren zain zeuden. Bakarrik geratu ziren. Mutil koxkor baten heriotza itxaroten zuten japoniar belaontzian. Bakarrik eta bakarrik geratu ziren, txori hil-hurrenen moko zabalduekin ametsetan, apo zanpatu berria ziztatzen duen itzalki zorrotzarekin, mila belarridun isiltasun baten azpian eta urezko aho txikiak ilargiaren eraso bortitzari eusten dioten haizpitarteetan. Negar egiten zuen belaontziko mutil koxkorrak eta kraskatu egiten ziren bihotzak lekukoak eta gauza guztien beilak artegatuak eta artean ere oinatz beltzeko lurzoru urdin zerukaran izen ilunak, listuak eta nikelezko radioak oihukatzen zituztelako. Ez dio axolarik azken orratza sartzen diotenean mutil koxkorra isiltzeak. Ez dio axolarik itsas haizearen arrutak kotoiaren korolan. Heriotzaren mundu bat baitago, arkuetara irten eta zuhaitzen atzealdeetan izoztuko zaituzteten marinel behin betikoekin. Alferrik da gauak bere bidaia ahazten dueneko bihurgunea bilatu eta traje hautsirik eta oskolarik eta negarrik izango ez duen isiltasun bat zelatatzea, armiarmaren oturuntza nimiñoa aski baita zeru osoaren oreka hausteko. Ez dago erremediorik japoniar belaontziaren intziriarentzat, ezta kantoiekin behaztopa egiten duen jende ezkutu honentzat ere. Landak bere buztanari ausiki egiten dio sustraiak puntu batean batzeko eta matazak bere luzetasun asegabezko irrika bilatzen du askian. Ilargia! Poliziak. Transatlantikoen sirenak! Pixezko fatxadak, kezkoak, anemonak, gomazko eskularruak. Dena hautsia dago terrazen gainean hankak zabalduta dituen gauean. Dena hautsia dago iturri isil izugarri baten hodi epeletan. Oi jendea! Oi andretxoak! Oi soldaduak! Idioten begietan barrena bidaiatu beharra izango da, kobra otzan argiak itsutuek txistu egiten duteneko landa libreak, oso sagar freskoak sortzen dituzten paisaia hilobiz beteak, aberatsek beren lupen atzean beldur dioten neurririk gabeko argia etor dadin, gorputz bakar baten usaina bi aldakirekin zitori eta arratoi eta intziri baten inguruan edo uhain sekula errepikatu gabeak ulertzen direneko kristaletan pixa egin dezakeen jende hori erre dadin. Poeta New Yorken
|
