LVOVERA JOATEA Gurasoei
Lvovera joatea. Zein geltokitatik abiatu Lvovera, ametsarenetik ez bada, egunsentiarekin, ihintzak maletak izozten dituenean eta abiadura handiko trenak zein tren espresoak jaiotzen direnean. Bat-batean Lvovera joatea, gauaren erdian, egunez, irailean edo martxoan. Baldin eta izan, Lvovik bada, mugen barruan topa badaiteke eta ez nire pasaporte berrian bakarrik, baldin eta oraindik arbolen lantzek –makal lizarrenek– arnas hoska jarraitzen badute indioen pare, eta erreken marmarrean irauten badute beren esperanto ilunean, eta sugeak, errusiar hizkuntzaren zeinu leunak bezala galtzen badira sasitzan. Maleta egin eta joatea, joatea agur esan gabe, eguerdiz, kordea galtzen duten dontzeilen modura desagertu. Eta lapa-belarrak, lapa-belar sorta berdeak, beherago, kafe veneziar baten eguzkitakoen pean eternitateaz gogoetan dabiltzan barraskiloekin. Baina gogoratu, katedrala zuzen altxatzen da, igande bat bezain zuzen eta ahozapi zuriak eta lurrean masustaz gainezka den kuboa eta oraindik sortu ere egin gabea zen nire desira, lorategiak baino ez eta sastrakak eta gingen anbar kolorea eta Fedro indezentea. Beti izan zen Lvov gehiegi. Inork ezingo lituzke haren auzo guztiak ulertu, eguzkiak erretako bere harrietako bakoitzaren murmurioa entzun, gauez, katedralarenaz bestelako zen eliza ortodoxoaren isiltasuna, Jesuitek orriz orri bataiatzen zituzten landareak, baina hazi egiten ziren, menderaezin hazten ziren eta edonon hartzen zuen bozkarioak aterpe, korridoreetan, bakarrik zebiltzan kafe errotatxoetan, te kikara urdinetan, lehen formalista izan zen almidoian, euri tantetan eta arrosen arantzetan. Leihoetan horitzen ziren forsitia izoztuak. Kanpaiek jo eta dardara egiten zuen aireak, mojen kornetek antzoki parean zebiltzan goleten pare nabigatzen zuten, hainbestekoa zen biltzen zen mundua ezen behin eta berriz eskaini behar izaten baitzituzten bisak, publikoa zoratu egiten zen eta uko egiten zion aretoa uzteari. Nire izebek oraindik ez zekiten inoiz berpiztuko nituenik, eta lasai bizi ziren, beren kasara; neskameak korrika irteten ziren esne gain fresko bila, txukun eta plantxatuta, etxeetan bazen haserre pixka bat eta esperantza handi bat. Brzozowski hitzaldiak ematen izan zen, nire osabetako batek Ahalguztidunari eskainitako Zergatik izeneko poema bat idazten zuen eta Lvov gehiegi zegoen, gain egiten zien edukiontziei, edalontziak lehertzen zituen, pantano guztiak gainezkatu, lakuak, tximinia guztiak bete bere keaz, su bilakatzen zen eta ekaitz, tximistekin egiten zuen barre, baretzen zen, etxera itzuli, Testamentu Berria irakurtzen zuen, sofan egiten zuen lo Karpatoetako artisau alfonbraren ondoan, Lvov gehiegi zegoen, eta orain ez dago batere, gupidagabe gabe ari zen hazten eta guraizeek moztu egiten zuten, maiatzean beti bezain hotz ziren lorezainek, errukirik gabe, maitasunik gabe, eta itxaron ekain epela iritsiko baita iratze leunak, udaren zelai mugagabeak, esan nahi baita, errealitatea. Baina moztu egiten zuten guraizeek luze-zabal haren haria, jostunek, lorezainek eta zentsuratzaileek gorputzak eta koroak segatzen zituzten, zizailek atsedenik gabe egiten zuten lan, umetako ebakigarrietan puntuak segitzeak beltxarga edo orein bat sortzen duen bezala. Guraizeek, labanek eta bizarra egitekoek urratu eta moztu eta muxarratu egiten zituzten prelatu soineko puztuak eta plazak eta etxeak, zuhaitzak zaratarik egin gabe erortzen ziren, oihanean bezala, eta katedralak ikara egiten zuen, eta agur egiten zuen jendeak zapirik gabe, malkorik gabe, ezpainak guztiz idor, ez zaitut gehiago ikusiko, hainbeste heriotza duzu zain, hiri guztiak bilakatuko baitira Jerusalen eta gizon guztiak judu, eta egin maleta orain presaka, beti, egunero, eta arnasarik hartu gabe abiatu, joan Lvovera, azkenean, izan badelako, mertxika bat bezain lasai eta puru. Leku guztietan dago.
LVOVERA JOATEA |