OIHAL ZURIAK Baporezko ontziak ikusten zituen Eugène Delacroixek Mantxako kanalean, nola hasi ziren motel eta sistematikoki oihal zuri puztuko fragatak bazterrean uzten, eta penaz idazten zuen horregatik bere egunerokoan: degradazioaren menpe dago inguratzen gaituen guztia, betirako doa desagertzen munduaren edertasuna; etenik gabe agertzen dira asmakizun berriak, erabilgarri izango direnak agian, baina infinituki hutsalak ere badirenak (trenbideak, esaterako, borreroaren besoa bezain astun diren lokomotorrekin). Zaldi ederrak eta lehoi mehatxagarriak margotzen zituen berak, muskulu tinkoekin ilaje laburraren pean, eta zipaioen uniformeak, odolak edota oihal exotikoek ematen duten gorritasun biziarekin, eta argia haien sablearen ahoan dantzan -eta gero makinak baino ez, makina grisak eta olio orbanak hondarretan, zerrautsetan (eta odola ere bai). Errealitate berri asko dago eta kikilduta dabil miragarri zen guztia, zail egiten da topatzea, gogoratzea, iraunaraztea, eta hala eta guztiz ere hodeiek jarraitzen dute altu, zuri, puztuta, multzo handios eta harroetan, airean pasatzen Frantziaren eta Alemaniaren eta Poloniaren gainetik, eta gu guztion gainetik eta ezkutatzen dituzte txori migratzaile fidelak, kurriloak eta elur-txoriak, eta haietan bizi dira ere enarak, urretxoriak, begiztak, eta berdin hiltzen gaituzten edo salbatzen gaituzten burdinazko aireontziak ere. Jarraitzen dute gure gainean hegan heriotzak eta salbazioak.
OIHAL ZURIAK |