BUKAERAREN POEMA
6
— Nik ez nuen nahi. Hori ez behintzat. (Isilik egon: aditu! Borondateaz — gorputz kontuan elkar baitugu — espiritu
gaurtik aurrera...) — Bera mintzo zen. (Bai, trena abiatzen denean, andreak daude, kopak bailiran, haustearen omenean...)
Eldarnioa ote? Oker entzun dut? (Galaiki, lili modura, ondra eman diozu odolez burura dezan haustura...)
— Silabaz silaba hitzak garbi: bana gaitezen gure oldez. (Gozamen larregiko unean zapi bat jausten den moldez...)
Gudu honetan zu zara Zesar. (Eraso miserablea! Garaikur gisa eskaini duzu astindutako sablea!)
— Berean darrai. (Belarrietan hotsak...) — Berriz makurtzen naiz: hausturan aurreratu zait behingoz. — Esaten al diezu maiz?
Ez du ukatzen! Hori bengantza, Lovelaceren neurriko. Keinuak ondra ematen dio, hezurra du bereiziko
haragitik. — Irriz. Irri bidez — Herio. Keinu. (Ez desio. Desioz batek ondokoari itzala egiten dio
gaurtik aurrera...) — Azken iltzea tinko berunezko kutxan. — Horra eskari azkena. — Arren. — Hitzak ditzazula uxa
gutaz... Gutarik inori buruz... (Ohatilan zaurituak bedatsez eskatu ohi duena!) — Hori nuen eskatua.
Oroigarritzat nire eraztuna? —Ez. — Begirada pisuez, noraezean. (Nola inprimatu bihotzean, zigilu lez
zure eskuan... Dramarik gabe! Hausnartuz.) Lasai ebatziz: — Liburu bat nahi? — Besteen gisan? Ez, ez zituzten idatzi,
liburuak...
* * *
Beraz, ez da beharrezko. Beraz, ez da beharrezko. Negarra, ez da beharrezko.
Gu denok adiskidantzan arrantzale alderraiak negarrik ez — hobe dantzan.
Ez negar, edan ezazu. Odol sutsuz ordaintzen da, malko beharrik ez duzu.
Perlazko ardo edabea urtuz gero — munduaren norma — negarrik gabea.
— Banoa, beraz? — Sakon behatuz. hezur gisan Arlekinak fidela zaion Pierrettegana duina ez den hasikina
aurtiki dio: finaren ondra. Azken hitz. Oihala behera. Berunezko apur batez bularra litzateke gozabera.
Ahoa estututa... behingoz, hagin are garbiagoz. Ez dut negarrik egingo.
Gaztelurik gogorrenak — mamirik mamienean. Negarrik gabe, bestenaz.
Alderraien ermandade, hiltzen dira, negar gabe, dena sutan, negar gabe.
Kantuaz eta errautsaz gorpua da ezkutuan, alderraien bide hutsak.
Lehena al naiz? Lehen urratsa? Xake jokoaren eitez? Urkaberako bidean ere lehenak baikara... — Fite,
ez begiratu, mesedez! — Hara. — (Nola ninietaratu turrusta biziz jausten ari den euria?!) — Ez begiratu,
berriro diotsut!!!
Begiak gora altxatuz eta ahots garbi eta itzelaz: — Goazen, maitea, negar egiten hasiko bainaiz bestela!
* * *
Ahantzia nuen! Lapiko artean (konplize — salerosleak) garondo horaila distiran dago: arto, gari, zekalea!
Laidoz —amazonaren biloaz!— Sinaiko aginduak, Golkondako altxor laketgarriak urrezko ilez astinduak.
(Denontzat!) Naturaren altxorra ez ohi da beti zekena! Non da, tropiko ehiztariok, bueltako bide zuzena?
Biluz lakarrak sortuak ditu negarra eta kilika, atsegalea urrezkoa da eta irria ñirñirka.
— Ez, ala? — Kizkur, zintzilik beha. Betileetan azkura. — Eta batik bat — keinu lodia! Kiribileko posturan.
O, janzki urratze imintzioa! Zailago da jan-edana — Irriz! Ez dago salbaziorik, bai hartarako afana.
Beraz — neba-arrebak al gara? Baturik muinetarako! — Ez ahantz irria! (Lurpean baina — irritan nago oraino.)
BUKAERAREN POEMA |