Libra nazazu eliza
ezkilaren soinutik

Libra nazazu zeru
tximistaren indarretik

Libra nazazu zuhaitz
adar makur eta bihurrietatik

Libra nazazu kale
pauso astun okerretatik

Libra nazazu maitasun
larruaren gosetik

Libra nazazu ibai
amorrutik eta marrumatik

Libra nazazu marruma
debaldetako marmarretatik

Libra nazazu gerla
matxokeriaren larderiatik

Libra nazazu bake
beharrezko sakrifiziotik

Libra nazazu whisky
ezein bihotzerretatik

Libra nazazu jabego
haurbako bikoteen altxor-kutxatik

Libra nazazu egun
eguzkiaren lauhazkatik

Libra nazazu gau
hontzaren begietatik

Libra nazazu herri
tiranoen estatuetatik

Libra nazazu mundu
zure mugetan dituzun abisu pozoituetatik

Libra nazazu bizitza
betiko presatik

Libra nazazu heriotza
kaburik gabeko hutsunetik

Libra nazazu poema maite
zentzurik ez duten hitzetatik

Eta zuk, Askatasuna esaten zaion hitz horrek,
libra nazazu zure prestutasunetik zure sakontasunetik