BILBO Gaztea nintzela gogor egin nizun aurka, aurpegia zurbildu nizun, ez baitzinen nire berbaren betekoa baina bai iraintzekoa, haurtzaroko altzo uher, euriz heze eta abadez ketu sorleku neurea.
Gau honetan ezin dut lo hartu, eta zure teilatuak dauzkat gogoan, zure kale-artean joandako garaia datorkit erasoan, eta minduraz egiten dizut dei Madrildik, zuk bakarrik eusten baitiozu neure begiratuari, zuk bakarrik ematen diezu zentzua lurraren gainean egin ditudan pausoei:
gomutan daukat Parisen oraindik ito egiten ninduela zure errautsezko zeruak
gero jo nuen Mosku gerra hotzeko Gagarin batek bezala, eta zure lantegien suak argitu zituen bat-batean Kremlingo harresiak
eta Shangaira jaitsi nintzenean Nerbioiko ontziez bete ziren kaiak
eta Habanara egin nuen hegan, eta uhartean ibili nintzen kopeta apur bat alboratuz, zure beharra baineukan ez galtzeko Iraultzaren erdian, zure beharra neukan hipokrisiarik zabarrenak begitartea zikintzen dizun mendizko eta harrizko hiri neurea, urrun, oso urreneko entzuten dudala mendekuaren eguna larrosa zuri baten gisan altxatzen Martíren gorpuaren ondoan.
BILBO |