TU DO STREET Musikak mugarritu egiten du gaua. Begiak itxi eta ikusten ditut gizonak hautsetan banalerroak marratzen. Amerika lainoaren eta kearen mintz artean itsuka sartzen da eta berriro haur bat naiz Bogalusan. Zuriak soilik dioten idazkunak eta Hank Snow. Gaur gauean barra-neskak txori tropikalen pare suntsitzen diren toki batean sartu naiz. Garagardo bat eskatu dudanean, ugazabandreak salmahai atzetik ez ulertuarena egin dit. Haren begirada aurpegi zuriak ehizatzen dabil disko makina psikodelikoan Hank Williams ari den bitartean. Judasena jokatzen dugu metrailadoreen tiro-segidek bat eginik gauzkaten leku bakarrean. Kalean barrena soldadu beltzek ere euren lur eremua zedarritzen dute. Sarrera mugatuko kartel batek bultza egin eta edertasunak eta gerrak zauritutako ahots hauen artean samurtasuna bilatzen dudan kalezulo gorde batera narama. Dak To eta Khe Sanh-eko oihanean genbiltzala, orain beso artean hartzen presatzen garen emakume hauen nebekin gudukatu ginen. Nazio bat baino gehiago da guk barruan daramaguna, izan ere bai soldadu beltzek nola zuriek maitale berberak besarkatzen ditugu minutu batzuen tartearekin, bakoitzak aurrekoen arnasa ahogozatuz, jakin gabe gela hauek elkarrekin lotuta daudela infernura doazen tunelak bezala.
TU DO STREET |