GALERA BAT GEHIAGO KONTURAKO “Ni, ni txinatarra naiz”, dio Be Haik —sarjento maiorraren amorantea da— frantsesetik ingelesera igaroz. Begiekin ulertzen dugu elkar hurrupa txikiz nire txanbiletik Coca-Cola edaten dugun bitartean. Egunak joan dira begirada lotsatiz hurrena agertu den arte, ez dirudi bera, dantzan ari balitz bezala mugituz burua, vietnamdarrek dakiten eran. Batzuetan begirada jasotzen dut eta zutik ikusten dut ate ondoan bertan niri begira zenbat denbora daraman asmatu ezinik, ni, entzungailuak jarrita James Brown edo Aretharekin kateatuta, lotan haren gizona, batek daki non gau guztiko mozkorra pasatzen. Familiagatik galdetu nion behin. “Ez garrantzitsua, GI”, esan zuen.
Denok ditugu geure mamuak. Nireak Annak L.A.tik igortzen dizkidan gutunak dira. Gaur goizean Be Hai sarjento maiorraren eta Alabaman dauden haren seme ilehorien argazki batekin agertu da. Hilabeteetan elkarri ihes eginez ibili gara gela honetan, banbuzko zuziekiko dantzariak. Estu-estu hartua du argazkia, burdin barra zorrotzezko ate batetik sartzeko baimena balitz bezala. Ez dago besterik esateko. Gela gure mugimendura jarri da eta Annak egun batzuk lehenago igorri zidan eleberria gainezka dagoen apalategitik labaindu da leun. Hitzak birbobinatu zaizkigu eztarrian kasete bat atzeraka biltzen denean bezala. Begiak itxi ditu, argazkia erori da bere eskutik bateko pika bezala orri zuri bat itzaleztatuz.
*GI: AEBetako soldaduak, batez ere maila apalekoak, izendatzeko laburdura, Government Issue-tik datorrena.
GALERA BAT GEHIAGO KONTURAKO |