Oi, ze zikin dagoen!

—gasolindegi txiki hau,

koipeztatua, koipez blaitua

zeharrargitasun beltz

kezkagarri, erabateko bateraino.

Kontuz pospolo horrekin!

 

Aitak besapeetan estutzen dion

buzo zikin, koipeztatua darama,

eta zenbait seme arin eta lotsagabe

eta koipetsuk laguntzen diote

(familia-gasolindegia da),

denak ere nahiko sakonki zikinduak.

 

Gasolindegian bizi ote dira?

Zementuzko arkupea du

hornigailuen atzean, eta bertan

zanpatutako eta koipez bustitako

zume-altzari sorta;

zumezko sofan

txakur zikin bat, eroso samar.

 

Komiki batzuek ematen dute

kolore-ukitu bakarra

—nolabaiteko kolore-ukitua.

Aulkitxo bat (sortaren parte)

estaltzen ari den

zapi handi eta ilun baten

gainean dautza, begoniatzar

adarlatz baten ondoan.

 

Zergatik lekuz kanpoko landarea?

Zergatik aulkitxoa?

Zergatik, oi, zergatik zapia?

(Bitxilore-puntadatan brodatua

margaritekin, nik uste,

eta kakorratz-lan grisak loditua).

 

Norbaitek brodatu zuen zapia.

Norbaitek ureztatzen du landarea,

edo koipeztatzen du, agian. Norbaitek

antolatzen ditu lata-ilarak

leuntasunez esan diezaieten

ESSO—SO—SO—SO

 

auto asaldatuei.

Norbaitek maite gaitu denok.