|
HAU ANARKISTA NERABE BATEK ERRAN ZIDAN BEHIN (Proiektu hau ez da orijinala. Aisialdietan apezpiku aritzen den E.B.k jakinarazi zidan, zeinek, bere aldetik, goian aipatu anarkista nerabearen ahotik —ogibidez potretagile— jasoa baitzuen.)
Ez akabatu apezak, supituki atzarri eta sekula santan atzeman den iruzurrik handienari erreparatzen diozuen herriak.
Aitzitik, bultza ezazue haien hazkuntza, alharazi eta asebete itzazue bedera-bedera arta bereziaz. Holan apaiz gizenak zamalkatuz joanen ahal zarete lanerat —gasolinaren prezioa beti eta gorago—, ostatu atarian loturik utzi eta erranen —Oi, behin eta berriz zuen baithan ernatzen den arbaso arbuiagarri hori— zuen zamaria azkar eta kementsuagoa dela bertze zaldiak oro baino. Igandeetan apez-lasterketen ikusterat eramanen ditugu haurrak —hori baita onartuko den zorizko joko bakarra— eta han nabarmen ageriko dira apezpikuen leinuko pur sang ederrak.
Orga-apezak izanen ditugu, bai eta zama-apezak ere, apez trostalari arinak edo hazitarakoak berdin, eta zalditegiek santutegi usaina izanen dute.
Apez ezdeusak baltsamatuak izanen dira egongelako apaingarritzat saldu aitzin: buruko tontsura hautsontzi gisa ere balia genezake.
HAU ANARKISTA NERABE BATEK ERRAN ZIDAN BEHIN |