Basatiei buruz
Gustavo Pereira

euskaratzailea: Jose Luis Otamendi
armiarma.eus, 2013

 

Sabana Handiko pemoiek goizeko ihintzari Chiriké-yeetakuú deitzen diote,

Izarren Listua esan nahi duena; malkoei Enú-parapué, begietako guarapoa

adierazi nahi duena, eta bihotzari Yewán-enapué: Sabeleko Hazia. Orinocoko

Deltako waraoek Mejo-koji [Bularreko Eguzkia] esaten dute arima izendatzeko.

Laguna esateko Ma-jokaraisa: Nire Beste Bihotza. Eta ahaztu esateko

Emonikitane esaten dute, Barkatzea esan nahi duena.

 

Inozo halakoek ez dakite zer dioten

Lurra esateko ama esaten dute

Ama esateko samurtasuna esaten dute

Samurtasuna esateko norbere burua inori eskaintzea

 

Halako sentimenduen nahaspila dute

ezen arrazoi osoz

gu garen jende zintzook

deitzen baitiegu basati.

 

 

*pemoi eta warao herria: Hegoamerikako herriak.

*guarapoa: belar edo lore infusioa.

 

Basatiei buruz
Gustavo Pereira

euskaratzailea: Jose Luis Otamendi
armiarma.eus, 2013