Hiru itzaletatik nator

baina beste bietara

ninderaman galtzadak markatu zuen mesprezua

ezagutzen dut soilik

 

Urte luzez arto garratza sentitu nuen hezurretan

gozoa zen arren nire haurtzaroko arepa

eta eguzkitsuak nire liluraldiak biltzen zituzten ohatze-sareak

Luzaroan esklaboaren erremina sentitu nuen

eta xamanen belaun hautsia

baina nork esan behar zidan azal zuri honen azpian

masail-hezur urrunak eta lumak eta aurriak

eta zigorradak eta txakurrak zeudenik

bazterretan dirdaika

euren porrotaren hondakinen azpitik

xehatutako mihiak agerian?

 

Nik jakin gabetanik ihes egin nuen

sagu-zaharrak

gauez ilun handitik eguerdia ekartzera joan ohi diren

teilatuetatik

Nik nire etzanguaren basamortuan egiten nuen estropezu

harantzago danborren gainetik buztinezko ontziak

ageri zirela

eta geziek gure haragian euren oskol sekretua listukatzen zutela

jakin gabe

Nik ez nuen ez zuraren norabidearen ez totuma-azalen

zezelaren berririk

eta ez txirulen diapason tristearenik

Ni hontz bat gehiago nintzen lur gainean

Historiak kondenatutako bat

Harik eta egun batez Itzal haien odolbildu zaharrak

niregana etorri

Eta gauza hauekin jabetu nintzen arte

 

 

*arepa: talo mota

*totuma: fruitu mota, azala, besteak beste, ontzitarako eta marakak egiteko erabili ohi da.