Neskatoa eta garrasia NESKATOA ETA GARRASIA
Hondartzan neskatoa dago, neskatoak familia du eta familiak etxe bat. Etxeak ate bat eta leiho bi ditu… Itsasoan, gerraontzi bat jolasten ari da hondartzan dabiltzanak tirokatzen: lau, bost, zazpi jausten dira harearen gainean. Neskatoa ozta-ozta salbatzen da lainozko esku bati esker. Halako esku zerutiar bat. Oihuka dio: Aita! Aita! Altxa nazazu, itzul gaitezen: itsaso hau ez da guretzat. Aitak, bere itzalarekin meztiturik, ausentziaren agonian, ez du erantzuten. Neskaren ahurrak odolez, hodeiak odolez. Haren garrasiak hegaz egiten du berarekin batera, hondartzatik urrun eta goraka. Garrasia gau mortuan. Ez dago oihartzunik oihartzunean eta neskatoak garrasi eternala azken orduko albiste bihurtzen du, segituan ahaztuko dena hegazkinak ate bat eta leiho bi dituen etxe bat bonbardatzera datozenean berriro.
Neskatoa eta garrasia |