Chaita ordokietara heldu da

horditutako elefantea bezala

zuhaitzei hostoak ebatsiz

mendeak zeuzkatenak etzanaraziz

iraganaren hautsa harrotuz

loreen lurrina

bazter urrunetaraino barreiatuz.

Irakurtzen ditugun istorio asko

haize hauek ekarri dituzte

Idazten ditugun istorio asko

haize hauek sortu dituzte.

 

Konfiantza osoko etxea eraiki dut baina

haize honek porroka litzake etxe zaharrak

isilarazi litzake ahots ahulak.

Haize honek eraman lezake

itsasoko ura zeruraino.

Haize honek eraman lezake

euria zerutik.

Nola ez dut esanen ba neuk ere

haize honek ezabatzen ahal dituela

herri honen gainean ditugun hodeiak?

Nola ez dut esanen ba neuk ere

haize honek kentzen ahal dituela

herri honen historiaren orrialde lotsagarriak?

Putz egiteko pipak jendeari dei egiten dion bezala

ari da haize hau iraultzarako deia egiten

orbelak zeruan barrena sakabanatuz.

Ez du ematen kontratistek

irabazi gizenak egiteko altxatu zituzten etxeok

luze iraunen dutenik.

Iduri luke ez dagoela hodeirik aski eguzkiaren izpiak gordetzeko

bizkarrezurrean jota herria argi ez dezan.

 

Nire etxeko banderak

Om Man-ni pad-me hum hitzak dauzka.

Arin inarrosten da egun.

Etxaurreko pepal zuhaitzaren hostoak

libreki dabiltza hegan egun.

Haizea, itxuraz,

bakearen eta egiaren bidean dabil.

Haizea, itxuraz, urduritua da

ongietorria egin beharrez Udaberriari.

 

Baina, nork daki?

Haizea trabarazi egin liteke

bere helburura iritsi baino lehen.

Nork daki?

Haize hau saihets liteke

bere helburu finkoa jarraituz.

 

Nork daki?

Haize honek zuztarretik atera lezake pepal zuhaitza

gerizpe hezea eskainiz ezin konta ahala bidekori.

Chaita ordokietara heldu da

horditutako elefantea bezala.

 

Erne guztiok, erne!

Zu, sukaldari, egizu zeure lana suak baino lehen.

Eta zu, familiaburu

etxekoak bortxaz manatu nahi dituzun hori

erne suari!

erne haizeari!

erne!