MUINOA Non dira Elmer, Herman, Bert, Tom eta Charley menderakoia, beso indartsua,leloa, hordia eta borrokazalea?
Den denak muinoan lo dautza
Bat sukarrak utzi zuen atzean, bat meatzean erre zen, bat borrokan hil zen, bat espetxean, bat zubitik behera erori zen emazte eta seme-alabentzako lanean ari zela.
Den denak muinoan lo, lo, lo dautza.
Non dira Ella, Kate, Mag, Lizzie eta Edith bihozbera, arimaz soila, ikusgarria, harroa, zoriontsua?
Den denak muinoan lo dautza.
Bat erditze lotsagarrian hil zen, Bat amoreminez, Bat astakirten batek hil zuen putetxean, Bat bihotzaren desioen xerka hautsitako harrotasunez, Bat, Parisen eta London urrunetan bizi ostean, sorterrira ekarri zuten Ella eta Kate eta Magen albora.
Den denak muinoan lo, lo, lo dautza.
Non dira osaba Isaac eta izeko Emily, eta Towny Kincaid zaharra eta Sevigne Houghton eta iraultza sasoiko gizon agurgarriekin berba egin zuen Walker alkatea?
Den denak muinoan lo dautza.
Gerran hildako semeak etxeratu zizkieten eta bizitzak zapaldutako alabak, eta guraso bako haur negartiak.
Den denak muinoan lo, lo, lo dautza.
Non da laurogeita hamar urtean bizitzarekin jolasean aritu den, bisutsari paparra agerian aurre egin dion, edan, astrapalean, ez emazte ez senide ez urre,ez maitasun ez zeru gogoan izan ez dituen Jones biolin-jole zaharra?
Hara hemen isildu ere egin barik, aspaldiko arrain frijitzeez, Clary’s Groveko antzinako zaldi lasterketez Abe Lincolnek behinola Springfielden esan zuenaz.
MUINOA |