ROBERT FULTON TANNER Aileza gizonak atzitzen eta suntsitzen duen esku erraldoiari haginka egin behinola, gure burdindegian patentatu berri nuen tranparen nondik norakoak azaltzen ari nintzela arratoi hark haginka egin zidan eran. Ostera, gizonak ezin du munstro ankerra den Bizitzarekiko mendekurik hartu. Gelan sartu —alegia, jaio eta gero bizi egin behar— arima garatzeko. Aikor erregutzen ari zinen ehizakia: emaztetzat hartzeko andra aberatsa ospea,goi-maila edo boterea munduan. Lan asko dago egiteke, lorpen ugari erdiesteko. Bai, noski! Amua babesten duten burdin-hariak. Azkenik, barrura sartzea lortu duzu —urratsa entzun duzu. Munstroa, Bizitza, gelan sartu da (zain zegoen malgukiaren hotsa entzun duenean) gazta itzel hori zelan marraskatzen duzun ikustera eta begi suharrez begirada zureetan iltzatzera, eta bekokia ilundurik irri egitera, eta trufatzera eta birao egitera zu haren tranpan tirrin-tarran zabizela zure miseriak asperrarazten duen arte.
ROBERT FULTON TANNER |