NIK BADAKIT NONGO TXORIAK Gau guztian ibili zaizkit txoriak beren koloreak kantatzen.
(Ez beren goizeko hegalen koloreak eguzkien hozkirrian.
Ez beren arratseko paparren koloreak eguzkien txingarrean.
Ez beren ohiko mokoen koloreak, gauean amatatzen baitira, hostoen eta loreen kolore ezagunak amatatzen diren legez).
Beste kolore batzuk, gizonak betiko galdu zuen hasierako paradisua loreek eta txoriek osoro ezagutzen duten paradisua.
Mundu guztian gaindi hegaz eta usainka doazen eta datozen lore eta txoriak.
Beste kolore batzuk, gizona ametsetan ibiltzen den paradisu aldagaitza.
Gau guztian ibili zaizkit txoriak beren koloreak kantatzen.
Beste kolore batzuk beren beste mundukoak eta gauean ateratzen dituztenak
Ondo itzarrik ikusi ditudan eta non dauden nik ondotxo dakidan kolore batzuk.
Nik badakit txoriak nondik etorri zaizkidan gauean kantatzera.
Nik badakit haize eta olatuak igarota nondik etorri zaizkidan nire koloreak kantatzera.
NIK BADAKIT NONGO TXORIAK |