ZEURE ARGIRA, ZEURE JENDERA, ZEURE GALAXIARA Ez hurkoa erail, ez ken ogi kozkorra zeure etxearen atarian azken hatsa hartzea erabaki zuen eskekoari ez gezurrik esan faltsuari jesar zaitez bilobei musu emateko aitona-amonen bakeari haginka egiteko garbi ezazu nire eskuon odola. Egizu kontu gertatuak gertatu anaia izan ninduzula eta harakina bezain ona naiz funtsean.
Ez ahantz nire herriaren argitan jausi zirenak guazuma, zutabe edo gitarra ederrak. Haien heriotza luzatzen zait hortzetan. Bere itzala andenean utzi zuen bidez-bidekoa nauzu errealitate itsugarriarekin egiten dut tupust erromantiko jatun, arrunt eltxoek ziztakatua naiz, arlote biziduna.
Zeiba baten sustraietan usteldu ahanzturaren edertasun osoa konkistatu nahi nuke nire herrian ahuspezka, guztiroko isildua zeharo hila, etxeratua.
Hainbeste egiteko utzi nuen egiteke nolako izangura gosetua, ze arraio bizitzak osorik liluratzen ninduen egun oroz dut nabaritzen goseak bere mahaira gomitatzen nauelarik maitatzen dudanean, zer edo zertarako sentitzen naizenean godalet bat hautsi edo poesia egiteko jolas solemne hau neure egiten dudalarik. Ez dut nire autoan zapart egin zuten uhinen kontaduria eginen, hobe ez ikusia ematea izan zatekeenari, zitekeenari, joandako urteei.
Zer aholku nik zuri: bizitza bizi, sortu, aniz argia ez uka zure pobreziak, dena duzu aldagarri aldatzeak emakume baten betetasunera garamatza kohete baten marmarrera salba salbatu beharrekoa, defenda mundua otsotuki hiltzen bazaituzte ez zaitezela hil gabe hil ingura zaitez galderez eta erantzunez (baina galdera gehiagoz erantzun bakoitzeko) eta atera burua gauez gau zeure argira, zeure jendera, zeure galaxiara.
ZEURE ARGIRA, ZEURE JENDERA, ZEURE GALAXIARA |