BANAOKO NESKA Busa gelditu egin zen. Bat-banaka jaitsi ziren bidaiariak. Zure eskuak eginak diren lur hau lantzen duten neska elemeniaren artean zinen zu. Elemenia, lurra eta eguerdiko eguzkia zara zu. Bidaiariak goldezuloetara makurtu ziren, aurpegietara galde egin zuten, izerditu egin ziren eta bazetozen ostera busera zu niregana heldu eta hizketan hasi zinenean eta irria ezpainetan esan zenidan egidazu argazkia, egidazu argazkia. Ulertu nuen neure kamera hutsarekin behar zintudala argazkitu, zure begiak hartu zeure aurpegiaren lurrean, zeure fantasma horrek ezezagun baten eskuetan bizi zedila nahi zenuelako. Eta egia esan ahaztua dudan arren nolakoa zaren hemen jarri naiz zure erretratua egiten letraz: hona Banaoko argi izerditua eta zure begiak elemeniaren lurrezko aurpegian.
BANAOKO NESKA |