BURDIN HESIA IREKI NUEN Ireki nuen burdin hesia, nabaritu nuen karranka enborren batekin egin nuen tupust eta leiho argitu bat ikusi nuen, baina egunsentiak irentsi egiten zituen hostoak eta zu ez zeunden han mundua apurtua eta ugertua dagoela esateko. Sartu nintzen, isilik igo nituen eskailerak beste ate bat zabaldu nuen, jaka kendu nuen jesarri egin nintzen, izerditan nengoela esan nion neure buruari, nire hitz, zurrunga eta hil egiteko makina jotzen hasi nintzen (zu lo zinen, zu lo zaude zuk ez dakizu zenbat maite zaitudan) gorbata eta alkandora erantzi nituen arratsalde honetan eman didazun arima berria jantzi tekla joka eta madarikazioka jarraitu nuen zu maitatzen eta ukabilak jaten.
Eta bestelako ahotsak heldu bat-batez: ezinezko eta ederrezko gauzak kantari zihoazen goiza sutzen, ibaian usteldu ziren musuak absentziak birrindu zituen ezpainak gogoan. Eta ez nuen besterik esan nahi izan: ez dut hitzik atera nahi, ausaz hesiaren karrankan hautsi nuen ankerki zure loaren airea. Zer axola sartu edo jalgi edo desjaio. Zapatak kendu eta itsumustuan jaurti ditut amoroski, munduaren aurka.
BURDIN HESIA IREKI NUEN |