FAREWELL 1
Zure barne-barnetik, belauniko, ume triste bat, ni lakoa, begira ari zaigu.
Haren zainetan gartuko den bizitza horrengatik gure bizitzek elkarrekin behar lukete kateatu.
Haren eskuengatik, zure eskuen alabak baitira, nire eskuek ere hil egin behar lukete.
Haren begi lurrean irekietatik malkoak ikusiko ditut egun batez zureetan.
2
Nik ez dut hura nahi, Maitea. Ezerk lotu ez gaitzan, ez gaitzala ezerk batu.
Ez zure ahoa lurrindu zuen hitzak ez zure hitzek esan ez zutenak.
Ez izan ez genuen maitasun festak ez zure leiho ondoko negarrek
3
(Maite dut musu eman eta gero alde egiten duten marinelen amodioa
Agindua uzten dute baina ez dira egundo itzultzen.
Kai bakoitzean emakume bat zain: marinelek musu eman eta badoaz
Gau batean herioarekin etzaten dira itsasoaren zolan.
4
Maite dut musuetan, ohean eta ogian partitzen den amodioa.
Betikoa izan daitekeen edo uxoa izan daitekeen amodioa)
Berriz ere maitatzeko lokabe iraun nahi duen amodioa
Amodio jainkoetsi etorri datorrena amodio jainkoetsi joan doana
5
Jada ez dira nire begiak zure begietan xarmatuko, jada ez da nire mina zure ondoan goxatuko.
Baina noan lekurantz eramango dut zure soa eta zoazen lekurantz eramango duzu nire mina.
Zeurea izan nintzen, nirea izan zinen. Zer gehiago? Elkarrekin egin genuen xoko bat amodioa iragandako bidean.
Zeurea izan nintzen, nirea izan zinen. Zu maite zaituenarena izango zara, zure baratzean nik ereindakoa batzen duenarena.
Ni banoa. Triste nago: baina beti nago triste. Zure besoetatik nator. Ez dakit norantz noan.
... Zure bihotzetik agur egiten dit ume batek. Eta neuk ere agur egiten diot.
(Crepusculario, 1923)
FAREWELL |