WALKING AROUND Kontua da gogaitzen naizela gizon izateaz. Kontua da sartzen naizela dendetan eta zinemetan ximelik, barruan itxirik, feltrozko beltxarga jatorri eta errautsezko uretan igerian bezala.
Ile-apaindegi usainak negar eragiten dit garrasi batean. Harri edo artile atsedena besterik ez dut nahi, ez saltegirik, ez lore-baratzerik, ez salgairik, ez betaurrekorik, ez igogailurik ikustea besterik ez dut nahi.
Kontua da gogaitzen naizela nire oin eta nire azazkalez eta nire ileaz eta nire itzalaz. Kontua da gogaitzen naizela gizon izateaz.
Hala ere atsegingarria litzateke notario bat ikaratzea lili moztu batez edo moja bati heriotza ematea belarri ukaldi batez. Ederra litzateke kaleetan aizto berde bat eskuan ibiltzea oihuka hotzaren hotzez hil arte.
Ez dut jarraitu nahi lanbroetako sustrai izaten, zalantzakor, zabal eginik, loguraz dardarka, ahuspez, lurraren errai bustien gainean, xurgatuz eta hausnartuz, egunero janez.
Ez dut niretzat hainbeste ezbehar nahi. Ez dut jarraitu nahi sustrai eta hilobi, lurpeko huts, hilen upategi, hozmindurik, saminez itota.
Horregatik astelehen egunak su hartzen du petrolioak legez ikusten nauenean natorrela nire kartzela aurpegiarekin eta igarotzean uhuri egiten du gurpil zauritu bat iduri, eta odol beroko urratsez inguratzen da gauerantz.
Eta bultzatzen nau halako bazter, halako etxe hezeetara, hezurrak leihotik ateratzen diren ospitaleetara, halako ozpin usaineko zapata-dendetara, pitzadurak lako kale beldurgarrietara.
Bada sufre koloreko txoririk eta heste nazkagarririk gorroto ditudan etxeetako ateetan zintzilik, bada kafeontzian ahaztutako hortzorderik, bada ispilurik lotsaz eta izuz negar egin beharko zukeenik, bada non-nahi aterkirik, eta edenik, eta zilborrik.
Ni pasieran nabil egonarriz, begiz, zapataz, amorruz, ahanzturaz, igaroan, zeharkatzen ditut bulegoak eta ortopedia-dendak, eta patioak non arropak dauden alanbre batetik eskegita: galtzazpiak, xukaderak eta alkandorak negar-malko geldi zikinak isurtzen dituztenak.
(Residencia en la tierra 2, 1935)
WALKING AROUND |