Baratze bat egin dut. Liliak hazten ditut

ontzi eta poteetan.

Edertasuna lantzen dut hutsalkiro.

Hosto berdeak eta haien oihu galkorrak bustitzen ditut.

Haize-erauntsitik, eguzki kiskalgarritik

babesten ditut. Egunero hiru-lau bider

so eginez begiratzen ditut,

eta Kreazioa sortuz eta sortuz

harrapatzen dut ustekabean.

Haiek, liliek, ez didate inoiz esan nola sentitzen duten

giza ahalegin hori gutiziarik izan gabe;

baina bizi dira, lilitu egiten dira, lagun egiten didate;

bisitariak atseginez hartzen dituzte,

nire ordez hitz eginez bezala, niri esanez bezala;

Araguaia bakez inguratzen dute;

eta zeruertz luzeki opakoa

itxaroz, galderaz,

erantzunez, kantu loratuz,

mugarritzen dute.