GORATZEA Urmaelen gainetik, haranen gainetik, mendien, basoen, lainoen, itsasoen gainetik eguzkiaz haratago, eterraz haratago, esfera izartsuen mugaldeaz haratago,
ene espiritu hori, bizkor mugitzen zara, eta, olatuekin hunkitzen den igerilari onaren gisan, mugagabetasun sakona pozez zeharkatzen duzu arraren guritasun esanezinaz.
Egizu hegaz keru gaizkor hauetatik urrun, zoaz goieneko airean garbitzera, eta edan, likore garbi eta jainkozkoa bailitzan, une aratzak betetzen dituen su argia.
Oinaze handien eta gogaitasunen atzean, zeinek beren pisuarekin izate lanbrotsua dorpetzen baitute, zoriontsua da hegazkada kementsuan zelai argi eta baketsuen gainera gora daitekeena;
hura, zeinen gogoa, hegatxabala bezala, goizeko zerurantz igotzen baita hegaldi librean, hura, zein bizitzaren gainean altxatzen baita eta ahalegin barik ulertzen baitu loreen eta gauza mutuen hizkuntza!
GORATZEA |