IBAIA Ibaia debekatuta dago. Azken muga, hondar urratuak desegiten diren tokian gelditzen dira nire oinak. Urruneko ibai-ertzean goldatzen ditu haizeak kolore itsuko distantziak, eta sakabanatzen irinezko jalkinak marea, kardulatz, dunen nahasgarri.
Eta inor ez dadila ausartu ibaian sartzen, oihartzun hil batek bere ahotsa finkatzen du lokatzean, estalki beltz-ilunak dituen ohatze horretan. Uraren azpitik, korridore berde argizkoek herrestan eramaten dituzte igerilari artagabeak arrosa beltzezko itsaso batera.
Ibaia debekatuta dago eta, hala ere, arrasti batzuetan beste etxe batzuetako mutikoak etorri eta zubitik amiltzen dira ispiluak zeharkatzen dituzten berunezko geziak legez, lazunen artean galtzen dira, itzultzen dira arautik eta legetik libre, ustekabeko.
Beste etxe batzuetakoak direlako eta ibai-ertz lausotik datozelako ez dago inor uretan sartzea debekatuko dienik. Guk barrua karrakatzen digun inbidia ostentzen dugu hondarrarekin olgetan, sekula santan gurutzatu behar ez dugun muga horretan.
IBAIA |