Pasternak, Boris Leonidovitx. Eleberrigilea eta poeta errusiarra (Mosku, 1890 - Peredelkino, Moskutik hurbil, 1960). Mosku eta Marburgoko unibertsitateetan egin zituen ikasketak. 1913an argitaratu zuen lehen poema bilduma, futurismoaren eraginpean. Oso ospetsua egin zen 1922an argitaratu zuen Sestra moya zhizn (Bizitza nire ahizpa) poema bildumari esker. Iraultzan inspiraturiko poema batzuk idatzi ondoren, 1931n autobiografia bat idatzi zuen prosaz, Okhrannaya gramota (Igaro-agiria). Poema oso gutxi argitaratu zuen 1935. urtetik aurrera, ez baitzegoen ados sobietar poesia ofizialarekin; atzerriko idazleen obrak itzultzen ihardun zuen, Shakespeare-renak, nagusiki. 1957an, Doktor Zhivago eleberria argitaratu zuen Italian, Errusian debekatu egin baitzioten. 1958an Literaturako Nobel saria irabazi zuen, baina sobietar agintariek sariari uko egitera behartu zuten. Azken urteak artisten kolonia batean eman zituen, Moskutik gertu.

[Idazleari buruzko informazio gehiago]