AUT AUT
Annie Vivanti

Aut aut, 1924
euskaratzailea: Koldo Izagirre
armiarma.eus, 2016

 

Eguzkia nahi dut, eguzki sutua

bere izarniaduraren horditasuna

edo eman diezadala gau ilunak

ekaitz handi eta haserrearen ikara.

Bihotzak hastio du ganduaren grisa:

Ekatzu zeru urdina edo ekaitza.

 

Askatasuna nahi dut! Mugabako

askatasun osoa nahi dut neure!

Edo bestela lau haga eta kutxa

iltzatuaren kartzela ilun estua.

O, infinitua ematen ez badidate

natzala lurpean, hegalak hautsita!

 

Zure maitasuna nahi dut, su eta oso,

osoko maitasuna ala herra gorria.

Maitasun edo herra, oso behar dut!

Ez dut jasaten ahal behako epelik.

Dena emateko, dena sufritzeko maitasuna

edo inoiz barkatzen ez dakien herra.

 

Dena ala deusez: algara edo negarra

urrezko eguzkia edo urakan beltza,

zerraldo estua edo ludi osoa

martiritza edo lilura zure begitik!

Ekatzu zure musua, zure bihotza,

edo oinazearen gurutze gorena!

 

AUT AUT
Annie Vivanti

Aut aut, 1924
euskaratzailea: Koldo Izagirre
armiarma.eus, 2016