Ez den eta soilik memoriaren mapetan

ezagutuko luketen

herri batera itzultzearekin

egiten dute amets

gauero, ametsen behelainoan,

mapak asmatzen dituzte,

alderrai dabiltzan itsasontzi zurietan

zeharkatzen dituztenak.

 

Euren begietako zeruetan galtzen diren

txorien hegalaldietan itzultzen dira

edo suzko diruditen kimak dituzten

zaldi hegodunetan.

 

Itzuliko balira

ez lukete ez lekua

ez kalea, ez etxea ezagutuko

kale ertzetan duda egingo lukete,

beste aldean egon usteko lukete.

 

Baina gauero itzultzen dira

ametsen itsasontzi zurietan,

zalantzarik gabeko norabidean.