DOHAINEN BIGARREN POEMA Eskertu gogo diot zio eta ondorioen labirinto jainkozkoari unibertso berezi hau osatzen duten izakien aniztasuna,
eskertu arrazoimena, zeinak ez dion labirintoaren plano batekin amets egiteari utziko,
eskertu Elenaren begitartea eta Ulisesen egonarria,
eskertu gogo diot maitasuna, zeinak beste lagunak ikusarazten dizkigun jainkoak berak ikusten dituen erara,
eskertu diamante trinkoa eta ur jarea, algebra, leihar zehatzen jauregia, Angel Silesioren txanpon mistikoak, Schopenhauer, zeinak menturaz unibertsoa deszifratu baitzuen, suaren garra, ezein gizakik ezin baitu begiratu antzinako lilura hura azaldu gabe, kaoba, zedroa eta sandaloa,
eskertu gatza eta ogia, larrosaren misterioa kolorea zabaltzen baitu berak ikusi gabe, 1955eko bezpera eta biharamun batzuk, ordokian aziendak eta ostantza gobernatzen dituzten unaiak, Montevideoko goiza, adiskidetasunaren artea, Sokratesen azken eguna, gurutze batetik bestera ilunabar hartan elkarri esandako hitz haiek, Islameko amets hura mila gau eta bat gehiago iraun zuena,
eskertu infernuari eta su arazgarriaren dorreari eta aintzazko esferei buruzko beste amets hura, Swedenborg, zeina solasten baitzen aingeruekin Londreseko kaleetan, nire baitan batzen diren erreka ezkutu eta lekutakoak, Nortunbrian, duela ez dakit zenbat mende, hitz egin nuen hizkuntza saxoien ezpata eta harpa,
eskertu itsasoa, zeina desertu distiratsua eta ez dakizkigun gauzen zifra bat eta bikingoen epitafioa baita, Ingalaterrako berbazko soinua, Alemaniako berbazko soinua, urrea, bertsoetan diz-diz dagiena, negu epikoa, irakurri ez dudan liburua: Gesta Dei per Francos, Verlaine, xoriak bezain xumea, kristalezko prisma eta brontzezko pisua, tigrearen marrak, San Franciscoko eta Manhattan uharteko dorre garaiak, Texaseko goiznabarra, Epistola Morala izkiriatu zuen sebilar hura, zeinaren izena, berak nahiko zuen bezala, ez baitakigu, Seneka eta Lukano, Kordobakoak, zeinek espainiera baino lehen espainiar literatura guztia idatzi baitzuten,
eskertu xake-joko geometriko eta oparoa, Zenonen dortoka eta Royceren mapa, eukaliptoen senda-usaina, hizkuntza, jakituria-irudi egin dezakeena, ahanztura, iragana ezabatu edo aldatzen duena, usadioa, ispilu gisa biderkatu eta egiaztatzen gaituena, goiza, hasiera baten ilusioa ekartzen baitigu, gaua, bere ilunpea eta bere astronomia, adorea eta besteen zoriona, aberria, jazminetan edo ezpata zahar batean hautemana, Whitman eta Asisko Frantzisko, poema idatzi baitzuten,
eskertu poema agortezina, izakien batuketarekin nahasia, azken bertsora sekula helduko ez dena eta pertsonen arabera bilakatzen dena, Frances Haslam, zeinak seme-alabei parkamena eskatu baitzien hain geldiro hiltzeagatik, loaren aurrekoxe minutuak, loa eta heriotza, altxor isileko bi horiek,
eskertu aipatzen ez ditudan barru-barruko dohainak,
eskertu gogo diot musika, denboraren eite misteriotsua.
DOHAINEN BIGARREN POEMA |