Rojas, Fernando de. Espainiar idazlea (La Puebla de Montalvan, Toledo, 1465 - Talavera de la Reina, 1541). Tragicomedia de Calisto y Melibea edo La Celestina hitz lauz idatzitako obra dramatikoaren egilea da. Oso datu gutxi iritsi dira gaur egunera Rojas-en bizitzaz. Zuzenbideko ikasketak egin bide zituen, eta Talavera de la Reinako alkate izan zen. La Celestina obraren lehen argitalpena 1499. urtekoa da, 16 kapituluz osatua, eta ez zuen ez izenbururik ez egilearen sinadurarik. 1502. urtean argitaratu zen obra osoa: Tragicomedia de Calisto y Melibea; baina ez dago jakiterik azken bost kapituluak nork idatzi zituen. Kultura handiko gizona izan zen Rojas ezbairik gabe, eta ondo ezagutzen zituen idazle latino klasikoak, Erdi Aroko komediak eta obra humanistikoak.

[Idazleari buruzko informazio gehiago]