Esopo. (Gr. Aisôpos). Ipuinlari grekoa (K.a. VI. mendea). Bere bizitza ez da oso ezaguna, elezaharretan galtzen baita. Frigian edo Trazian jaioa litzateke, konkortua eta herrena. Esklaboa zen, baina aske utzi zuten. Ekialde Hurbilera joan omen zen, eta ondoren Kresok bidalita, Atenas, Korinto eta Delfosen izan zen; azken hiri horretan apezek hil zuten. Haren Alegiak, V. mendeaz geroztik egin ziren ezagunak eta Europako hizkuntza askotara itzuli dira. Faleroko Demetriok jaso (IV. mendea), eta ondoren Babriasek bertsotan jarri zituen; Fedrok eta alegiak idatzi zituzten idazleek oinarritzat hartu zituzten beren lanetan. Gure egunetaraino heldu den hitz lauzko bertsioa Planodiok egina da (XIV. mendea). Bertsio honetan, alegiak oso kontakizun laburrak dira, literatura balio gehiegirik gabeak, eta ondorio morala dute beti. Pertsonaiak gehienetan animaliak dira, gizakien azturak irudikatuz.

[Idazleari buruzko informazio gehiago]