Anibal Monteiro Machado (Sabará, 1894 - Rio de Janeiro, 1964). Ipuinlaria, kultur eragilea. Zuzenbidea ikasten ari zela zenbait testu argitaratu zituen  Vida de Minas aldizkarian. Rio de Janeiron jarri zen bizitzen 1923an, eta bere etxea kulturgune eta topaleku garrantzitsua bihurtu zen laster. Obra laburreko egilea izaki, bere jardun intelektuala da bereziki oroitzen dena: kulturaren suspertzaile, abangoardia politikoen ekarle, idazle engaiatua. Bere literaturaren muina Vila Feliz (1944) ipuin bilduman eman zuela diote adituek: errealismoa guztiz baztertu gabeko giro onirikoa eta idazkeraren askatasuna. Hurrengo urtean Associação Brasileira de Escritores elkarteko lehendakari izendatu zuten, eta Brasilgo Idazleen Lehen Kongresua antolatu zuen berehala. Bertan, bere eraginez, zenbait idazlek Getulio Vargasen Diktaduraren Aurkako Oinarrizko Printzipioak idatzi eta eman zituzten argitara. Azken urteetan antzerkirako obra ugari itzuli eta atondu zituen.

[Idazleari buruzko informazio gehiago]