Rodríguez Castelao, Alfonso. Politikari, idazle eta marrazkigile galiziarra (Rianxo, 1886 - Buenos Aires, Argentina, 1950). Medikuntzako ikasketak egin zituen Santiagoko unibertsitatean, eta lur jabe handiak salatzen zituen El barbero municipal astekaria sortu zuen 1909an. Galiziako nekazarien klase kontzientzia piztu nahi zuen Acción gallega mugimenduari atxiki zitzaion 1912an. 1926an Galiziako akademiakide izendatu zuten, eta 1931n diputatu hautatu Organización republicana gallega autónoma-ren eskutik. Lerroux-en gobernuak Badajozera erbesteratu zuen (1934), baina diputatu hautatu zuten berriro ere Fronte Popularraren eskutik (1936). Gerra zibila amaitu zenean atzerrira jo behar izan zuen eta erbesteko gobernu errepublikarreko kide izan zen. Literaturari dagokionez, galegoz idatzi zuen batez ere. Kontakizun liburuak, saiakerak, politikari buruzko obrak eta antzerki lanak idatzi zituen: Cousas (1926, Gauzak), Os dous de sempre (1934, Betiko biak), Retrincos (1934, Zirtzilak eta Kristalezko begia), Os vellos no deben de namorarse (1941, Zaharrek ez dute maitemindu behar), Siempre en Galicia (1944, Beti Galizian) eta Las cruces de piedra en Galicia (hil ondoren argitaratua; Harrizko gurutzeak Galizian). Marrazkien bidez, halaber, Galiziako gizarte injustiziak salatu nahi izan zituen. Egilearen marrazki gehienak garai hartako aldizkarietan daude argitaratuak; horietako gutxi batzuk baizik ez dira museoetan gorde. Marrazki horietatik euskaraz Cousas da vida argitaratu da, Gabriel Arestik euskarara itzulita.

[Idazleari buruzko informazio gehiago]