HEGOALDEA. UKATZE HANDIA
Daniel Salgado

Sur. O gran rexeitamento
euskaratzailea: Ibon Rodríguez García
armiarma.eus, 2019

 

 

amorrua pasa da / suntsitu du

 

antonio das mortesek

bere zaldia

 

ezerk irauten ez duelako ideia biolentoa

ezerk salbu eta lazturak

                       argi ustelak

 

potentzia ilunak eta herri armatuak

 

amorru hori odolaren eran

 

da egiaztatzen / azkenean

gure besoek

 

jakin dakite berriz gerta daitekeela

 

 

 

gogogabekeria dago eta ez paradisurik

 

bakea dago eta faltsua da bakea ez baita posible

inoiz ez / egungo baldintzetan

 

hainbat etxe sutan eta gatazka

lanen eta egunen motore

 

hastapeneko lirika grekoan nola / bere muina

 

gure urratsen helmuga zalantzagarria dago

probokazioa dago eta tematuta diote paradisurik ez

 

 

 

eguzki bitxia da

atzealdetik da ageri

 

lotsa bezala

 

parkea inbaditzen du

 

ezerk ez du azaltzen ezer

mihia bere baitan ixten da

 

ordu honetan

hiri arpilatuen oroimena

kameliaren hondamendia lurraren kontra

 

izuaren zirkulazio gorra

izan gauaren beldur

 

haren arnaste biolentoarena

eta haren zarata itzaliaren ahoarena

 

isiltasuna nola hurbiltzen den

 

nola hurbiltzen den

eta bere baldintzak ezarri

 

izan gauaren beldur

 

jagon haren mugak

eutsiozu uko egiteko aukerari

 

eutsiozu beti uko egiteko aukerari

argi dirdiratsu honen atarian

 

ez da magia / basakeria da

 

existitzeko ahalegina

eta historiaz libratzekoa

 

alferrikako ahalegina

 

historia ere hartzitu egiten baita / odolusten

hanpatu egiten da beldurrez eta desertatu nahi duzu

 

jada ez du inork erabakitzen / nola bizi

beltxarga hila da

 

beltxarga hila da

 

 

 

suminak zeharkatuta / kristalez josita

atezuan poema baten aurretik mihia nola

adi / desegoki

mugimendu bakarra deskonposizioa

 

 

—eldarnio hori / su hori

 

eta babesik eza—

 

uzkurtzen dira formak / zailtzen

orientazioa

 

ez / inoiz ez

beldurraren erdigunean

 

beldurraren hasieraren erdigunean

 

gertatzear da zerbait / edozer

 

 

 

              1

 

otsoaren airea ufaka

bihurritzen da metala

 

espasmoek zeharkatuta / dator zarata

 

indarrean dagoen egia

                       erbestearen lekuko

kondenatuen borondate dudabakoa

 

nolabait

edertasuna tematu egiten da / igarotzen

kolapsatzen diren egituren artean

 

 

 

              2

 

mamuak ez dira agertzen

desfilatzen dute

 

ispiluen hondoan dardaratzen dira

liberazio hondarrak nola / errautsa nola

arrosen gainean

 

mundu honetakoa da haren nagusitasuna

eta gertakizunen bide lineala ezeztatzen du

 

materiaren konposizio zehatza

 

borrokatzen dira

akademiak ordenatutako munduaren kontra

 

higitzen dira

 

 

 

              3

 

den-dena kutsatzen du suak

 

liztorren dinamika asmaezinak

eragiten

 

anabasa berria deika / eguzki beltz batengatik

 

denak eztanda egin dezakeen

abisua

 

izpiritu ankerrak motel ibiltzen dira / iraultza beteko hiriaren gainean

 

ez da

ozeanorik begien bistan

xahutasuna ez da baliagarria / apenas egia erritmikoa

 

desoreka da logika

desoreka da gauzen logika

 

 

 

              5

 

zarata historikodun masa handiak

higitzen dira

 

saloi nobleen kontra lehertzen dira / eta herri-dantzak

 

egiarako metodoa

dira

 

                * * *

 

aurrera egiten dute / eraldatzen dira / etsitzen dira

iragaten den denboraren bazka

 

haren laketasunak mugekin egiten du tupust

baina ez du inoiz amore ematen

 

kondenatuen egitea da / ekin eta ekin

 

 

 

              6

 

harmoniaren kontra / piztutako gorrotoan

beste egutegi bat da azaleratzen

 

denbora ez da neurtzen gizon zuriaren erlojuaz

 

santua

gauzen antolatze modu hau

suntsitzen duen detonazioa

 

 

 

              7

 

iragana matxinatzen da

hildakoak askatzen laguntzen du

 

denboraren igarotzea hausten duen

                     zarata sakratua da

 

kontrol polizialari itzuri egiten dion hori

 

musikariak kaosera hurbildu nahi du

baina ez du iparra galtzen

 

arte beltza / dio poetak / arte beltza

 

haize bortitz batek zeharkatzen ditu gorputzak

jauregi bat asaltatzen

 

eta portzelana gutxiesten duenak nola

 

 

 

              8

 

ez dago halako eraso bati aurre egingo dion ispilurik

 

dirdira oro

                birrintzen duen haizetea

 

munduaren pisua amodioa zen / orain

eskonbro hauek dira

 

suntsitutakoa

 

eta hala ere duda agertzen da / esklaboen memoria

 

uharteen geografia erabaki zuten armak

jakobino beltzak

 

jendaila ugazabaren etxean nola

 

 

 

salgaien zirkulazioa eteten du

 

 

 

              14

 

aginduak dio

inongo legerik ez errespetatzeko

 

ez ezkilarik ez profetarik ez argirik

iluntasunean

 

                     apenas piztiarik

eta iraganaren irudi distortsionatua

apenas gotorleku eraitsirik

 

burrunba itxuragabe hori

                     baina tropel mendebaldarrak garaitzen dituena

 

kausa sakratua da / arriskua

esklaboen matxinada

 

dinastiaren azkena / askatasunaren hasiera

 

erortzen dira zuhaitzak

                     erortzen dira zuhaitzak

 

 

HEGOALDEA. UKATZE HANDIA
Daniel Salgado

Sur. O gran rexeitamento
euskaratzailea: Ibon Rodríguez García
armiarma.eus, 2019