Ezagutzen ez dudan zakur hau nire ondotik,

penagarri, atzeko hanka herren, zakur elbarri baten itzala.

A, ez dakit nora noan,

norantzako bidean noan,

haizeak txabolen teilatuak harrotzen ditu

bide huts eta ilunean astiro dira mugitzen

landare beltz eta hezurtsuen hostoak.

 

A, ez dakit nora noan

organismo antza duen ilargia flotean da nire aitzinean,

eta bide hutsean nire ondotik

zakur buztan luze mehearen punta lurrean arrastaka.

 

A, zer ardura distantziak, ni noan distantziak,

zakur ezezagun hau jarraika

zoru zikinean barrena narras

nire ondotik, atzeko hanka arrastaka, zakur eri bat,

uzkur, betizu, ikara hitsean

ilargi bakartiari uluka urrun eta zurbil,

zorigaiztoko baten itzala.