Martí, José Julián. Kubako idazlea (La Habana, 1853 - Boca de Dos Rios, 1895). Gazterik hasi zen Kubaren burujabetasunaren alde borrokan. Espetxeratu eta 1868an Espainiara bidali zuten. Zuzenbide ikasketak egin zituen Madrilen. 1875ean Mexikora joan zen, eta Amor con amor se paga bertsoz egindako lana antzeztu zuen. 1878an Kubara itzuli zen, baina handik urtebetera berriro atxilotu, eta atzera atzerrira bidali zuten. Kubako Alderdi Iraultzailearen oinarriak idatzi zituen Máximo Gómez-ekin batera. 1885an, Amistad funesta eleberri modernista idatzi zuen. 1891an Versos Sencillos argitaratu zuen, bere poema liburu landuena. 1891ean, beste lan guztiak utzirik, Kubako Iraultzaren alde jarri zen lanean. Armen bidez Kubaren askatasunaren alde aritu zen borrokan, 1895ean guduan hil zen arte. Azken hiru hilabetetan egunkari bat idatzi zuen, Diario de campaña. Politikan, ideia demokratikoak eta arrazakeriaren kontrakoak azaldu zituen; bestalde, Martí izan zen Hego Amerikako herrien batasunaren aldeko aldarrikapenak egin zituen lehen pentsalarietako bat, Espainiako eta Estatu Batuetako inperialismoaren kontra. Literaturan modernismoaren aitzindarietako bat izan zen, eta bere poesiak Walt Wihtman-en eragina duela esan liteke. Martírenak dira, halaber: El presidio en Cuba (1871), La república española ante la revolución cubana (1873), eta Las reformas (1873) saioak.

[Idazleari buruzko informazio gehiago]