Hebbel, Christian Friedrich. Antzerkigile alemaniarra (Wesselburen, 1813 - Viena, 1863). Hamalau urte zituela umezurtz gelditu zen eta bere kabuz ikasi zuen Hanburgon eta Heidelbergen. Danimarkako erregeak emaniko laguntzari esker Parisen egon zen 1842an (Heine ezagutu zuen han) eta Erroman urtebeteko egonaldia egin zuen. Bere obra dramatikoan errealitatea modu objetiboz aztertzen du, eta gizabanakoaren moralaren eta gizartearen arteko gatazka islatzen ditu. Lehen drama garrantzizkoa, Judith (1841), gai biblikoaren moldaera librea da. Maria Magdalena (1844) etika burgesaren eta ohoreaz hark duen ikusmoldearen aurkako kritika da. Herodes und Marianne (1850) obran Marianak, bere askatasuna sendotzearren, maite duen gizonari ere aurre egingo dio. Agnes Bernauer (1855) izenburukoan estatu-arrazoia delakoari buruz dihardu. Beste obra batzuk: Cyges und sein Ring (1856, Ciges eta bere eraztuna); Die Nibelungen trilogia (1862), izen bereko sagaren egokipena da, eta autorearen sormen dramatikoaren adierazgarri nagusia. Hebbelen obrek, neurri batean, Nietzscheren eta Ibsenen gogoeta moldeen oinarriak eman zituzten.

[Idazleari buruzko informazio gehiago]