Ferreiro, Celso Emilio. Galiziako poeta (Celanova, 1912 - Madril, 1979). Gerra Zibila baino lehen hasi zen idazten, baina 1954n eman zuen argitara lehen poema liburu aipagarria (O sono sulugado, Amets murgildua). 1962an, gerra ondoko Galiziako lirikak eman duen poema liburu hoberenetako bat argitaratu zuen: Longa noite de pedra, Harrizko gau luzea; eragina izan zuen liburu honek Gabriel Aresti euskaldunaren obran. Viaxe ao país dos ananos (1968, Bidaia nanoen lurrera), Antipoemas (1972, Antipoemak), Cimenterio privado (1973, Hilerri pribatua) liburuak argitaratu zituen ondoren. Ordura arte, Galiziako lurrari, jendeari eta hizkuntzari loturiko salakuntza izan zen Ferreiroren poesia. Onde o mundo chámase Celanova (1975, Munduak Celanova izena hartzen duen lekuan) obraz aldendu egin zen ordura arteko poesia moldeetatik. Kontakizunak eta eleberri laburrak ere idatzi zituen: A fronteira infinda, Mugagabeko muga (1972), Ameriketan girotuak gehienak.

[Idazleari buruzko informazio gehiago]