Steinbeck, John. Estatu Batuetako idazlea (Salinas, Kalifornia, 1902 - New York, 1968). Lanbide askotan ihardun izanak eragin handia izan zuen gero bere eleberrigintzan. Lehen liburuetan gizarte gaiei ematen zien garrantzia batez ere, behartsuenganako atxikimendua eta elkartasuna adieraziz: In Dubious Battle (1935, Zalantzazko borrokan), The Grapes of Wrath (1939, Haserrearen mahats-aleak), Steinbeck-en liburu ezagunetako bat, John Ford-ek 1940an zinemara egokitu zuena; Tortilla Flat (1935), arrakasta handia izan zuena; Of Mice and Men (1937, Saguak eta arratoiak). Bigarren Mundu Gerra bitartean gerrako kazetari izan zen, eta propagandako liburuak idatzi zituen. Hasierako lanetan gizarte gaiak landu bazituen ere, denborarekin jarrera kontserbadoreagoak azaldu zituen, eta besteak beste Vietnamgo gerraren alde agertu zen. Zinemarako gidoiak idatzi zituen, horien artean Elia Kazanen Viva Zapata (1952). Literaturako Nobel saria eman zioten 1962an. Beste idazlanak: East of Eden (1952, Eden ekialdean), Elia Kazanek 1955ean zinemara egokitu zuena; The Way-Ward Bus (1947, Autobus galdua), The Pearl (1948, Perla), The Acts of King Arthur and his Noble Knights (1959, Arturo erregearen eta haren zaldun prestuen ekintzak).

[Idazleari buruzko informazio gehiago]