HAURTZAROAZ BURUTAZIO LABUR ZENBAIT Haurtzaroko zelai urdinxketan haurtzaroa besterik ez dago.
Orobat ez dago ezer zeru horixkan ere, ez horma okre biluzietan, ezta horma okre biluzien atzean, ez ekialdeko zerumugan, ez zerumugaz haruntza ere, ez etxe ttipian, ez dianan, ez ispiluan ezta ispiluaz bestaldean ere.
Haurtzaroa ezik.
Gauzak bitxiak eta arrotzak zaizkigu, lehendik zeuden eta hor egongo dira. Oroimena iristen zaidaneraino, beraz, haurtzaroa izenik ez xederik ez duten gauza eta gizaki konfederazio baten erdiko bakardadea da.
Izenak eta helburuak geuk beranduago pentsatuak dira. Halatan uste dugu hormak zerbait beste zerbaitetik bereizten duela, etxeak ekaitzetik babesten gaituela eta urretxindorrak zoriona barreiatu duela kantuz ipuinetan zoragarrietan.
Hauxe da guk sinesten duguna. Baina agian ez da horrela.
Etxeen hustasuna mugagabea baita, mugagabea ere urretxindorren ankerkeria, eta ataka batetik besterainoko xendrak ez du amaierarik.
Eta bilatzeaz batera galdu egiten dugu, eta aurkitzean ezkutatu. Zeren oraindik haurtzaroaren peskizan baikabiltza.
HAURTZAROAZ BURUTAZIO LABUR ZENBAIT |