Orwell, George. (Jaiotza izenez, Eric Arthur Blair). Idazle ingelesa, Indian jaioa (Motihari, Bengala, 1903 - Londres, 1950). 1922-1927 urteetan indiar polizia inperialaren zerbitzari egon zen Burman eta egonaldi hartatik sortu zen Burmese Days (1934, Burmako egunak) eleberria. Ondoren Ingalaterrara itzuli zen eta Paris eta Londresko auzune behartsuenetan lanean aritu zen bertako bizimodua ezagutzeko. Bizimodu hura Down and Out in Paris and London (1933) eleberrian islatu zuen. Espainiako Gerra Zibilean parte hartu zuen errepublikarren alderdian, eta Homage to Catalonia (1938, Omenaldia Kataluniari) lanean, Espainiako Alderdi Komunistaren eta Sobiet Batasunaren aurkako jarrera agertu zuen, ezkerreko anarkismoa suntsitu zutela eta falangisten etorrera bultzatu zutela salatuz. Estalinismoak zituen bideen eta mota guztietako totalitarismoen aurkakoa zen, eta Animal Farm (1945, Abereen etxaldea) eleberrian komunismoaren satira zorrotza egin zuen. Idatzi zuen azken eleberrian, Nineteen Eighty-Four (1949, Mila bederatziehun eta laurogeita lau) etorkizuneko gizartearen kontakizun beldurgarria egin zuen. Literatura kritika eta soziologia saiakerak ere idatzi zituen.

[Idazleari buruzko informazio gehiago]

Donne, John. Ingalaterrako predikari, poeta eta filosofoa (Londres, 1573 - Londres, 1631). Oxfordeko, Cambridgeko eta Londresko unibertsitateetan egin zituen Literatura, Zuzenbide eta Teologia ikasketak. 1615. urtean apaiz protestante egin zen. Poesia metafisikoa delakoak eman duen olerkari nagusia izateaz gainera, erlijio gaiei buruzko hizlari bikaina izan zen. Europako barrokoko olerkaririk handienetakoa izan zela esan daiteke, nahiz eta haren poesia XIX. mendera arte ez zen aintzat hartu. Obra nagusiak: The Good Morroow (Egunonak), An Anatomy of the World (Munduko anatomia), Holy Sonnets (Soneto sakratuak) eta Death's Duel, bere azken predikua.

[Idazleari buruzko informazio gehiago]

[Idazleari buruzko informazioa]

[Idazleari buruzko informazioa]