|
HODEIAK Hodeien deskribapena azkar-azkar egin beharko nuke, segundo erdi bat aski zaie beste zerbait bihurtzeko.
Bere-berezkoa dute: ez dira sekula errepikatzen itxurak, ñabardurak, jarrerak eta ordena.
Oroimenen zamarik gabe, egitateen gainetik erraz egiten dute hegan. Nolatan izan daitezke, bada, ezeren lekuko!, segundo bakar batean, noranahi barreiatzen dira.
Hodeiekin alderatuta, bizitza oinak lurrean dituela dirudi, ia iraunkorra, ia betikoa.
Hodeien aldean harri bat ere anaia baten antzekoa da, fidatzeko moduko norbait, eta hodeiak, berriz, urruneko lehengusina kaskarinak.
Jendea izan, izan dadila nahi badu, eta gero hil daitezela, bata bestearen atzetik: hodeiei bost axola zaie handik goitik beheko horiek, hain arraroak.
Eta horregatik hodeien desfile harroa, lehen bezala orain ere, zure bizitzaren gainetik pasatzen da, baita nirearen gainetik ere, oraindik osatugabea.
Ez dute gurekin batera hiltzeko beharrik. Ez dute ikusiak izateko beharrik pasatzen direlarik.
HODEIAK |