SPITFIRE Bi adiskide abiadura handi eta arriskutsu batean partitu dira: zain daukate mundua, nahiz beti bertan ibili izan diren zentzu gehiago edo gutxiagorekin. Orain ordea ordu gutxi barru Riora edo Dakarrera helduko dira; beharbada bossa nova batekin katigatuko dira, armetan den emakume beltz baten sorbalda distiratsua ferekatu; beste hizkuntza bat bizi, beste bizitza bat: bestelako ametsak eta bestelako mina, beste baraualdi traidore eta otzan bat.
Adiskide hauek iritsi egin beharko dute, hara jarri. Lekua nahasgarria edo gozakaitza izango da; ederra edo bizkorra edo etsigarria edo bitxia. Itxura bat edo bestea duela sinetsaraziko die; itsutu ere egingo ditu: ezkutatzen duen benetakoa den oro estali eta babestuko duen edozein basakeria. Lanak emango dizkie leku hori ezagutzeak; atezuan beharko dute, pazientzia.
Agurrekoan inork ez zuen kontuotan pentsatu. Eurei ere ez zitzaien burutik pasa. Hegazkin barrura igo aurretik edozeri barre egiten genion. “Disimulua edo axola-eza ote da?”, baina inork ezin du entzun haizeagatik, eta turbo-helizeen zaratagatik.
Gauaren azkenaz gero ezagutzen ditut. Droga batzuk eta mundu txiker honetako emakume bat edo beste partekatu genituen. Bazen alkohola eta gogoa eta oparotasuna eta etsipen erromantikoa. Osasunaren bila lehiatu gara mundu txiker eri honetan, eta epileptikoen pare sufritzera etorri gara hainbeste goizalde burdinazkotan, lasaigarrien atean joka, azken teari erreguka eskatuz erauz gaitzala buruko, bihotzeko eta zangoetako minetik, hainbeste ibiltzearen eraginez, eta batere harrokeriarik gabe elkarri hainbestetan historia berbera kontatzeagatik, betiko maitasuna, beldurra.
Triste samar uzten naute bi adiskide hauek; barregarria badirudi ere ez dut atsegin hain urrunera joan daitezen. Badakit xera eta amorrua onartzea kosta egiten zaidana; lotsatu egiten nauela kirats sentikor honek; larregizkoa dela gainera etorri zaigun mende honetako azienda batentzat; gizaki mendebaldar eta zuria baina judutar ere ez dena, baizik eta bihotz gogorrekoa asko jota.
Xakea, latina, bertsoak, antzerkia, politika eta borrokaldiak gu batzeko gai izan ziren; baita zenbait apeta eta mania ere subjektibotasun batzuen egia objektiboaren eta existentziaren auzi horretara hurbildu gintuztenak azken batean, eta maitasunarenera eta, jakina, delako iraultzarenera, sekula bakean utzi ez gintuena eta zerikusi handia izan zuena partitzeen eta emozioen eta asegabetasunaren kontuekin, ekarri zuena gure geroa jokoan jartzea, harietan listuta geratzea.
Kidekoak gara, nolabait esatearren, eta mundua hitz batzuekin mugiarazteko premiak harrapatuta gauzka, edo egitasmoen bitartez, edo ortzi muga-berrien-xerka bidaiatuz, edo gezurretan ibiliz: izango dugu zerbait esateko seguru asko, nahiz eta baieztatzen zaila dirudien egitateak edo promesak izango diren. Handinahiak gara eta herioren eskutik baino ez da etorriko isiltasuna eta bakardadea.
Ortzi sabaia behean dago, joan badoazen gure adiskideak ezagutuz bezala. Ezerk ez digu atzera egin araziko: arrakastari beldur handiagoa diogu porrotari baino. Hegazkina hodei baxuetan murgildu da. Gezurra dirudien arren, beti lainatuta egoten da horrelako une zailetan eta bihotz askok uzkurtu eta dar-dar egiten dute partitzea iragartzen duten motorrekin batera.
Lauzpabost emakume aurreratu eta dotore ikusi ditut, negarrez hasi dira. Hodeiak hormatuta daude eta euren malkoak izoztu egin dira Ezeizako eta despediden busti lehorrean, eta ortzia eta jendea.
SPITFIRE |