HEGOALDEKO GELTOKIA ...milorriak, kardu likinak, / rudbeckiak, datura... // Jarleku bat ipini dute / errailak / inguratzen dituen bidean. // Barrenean, pasoa / mozten duten / hesiak; // haruntzago sastrakadia / berdintzeke oraindik. // Auzo batzuk badira non / lan publikoak berandutu egiten diren // hurrengo krisiaren / hasierara arte. // ...bitxiloreak, hirustak, / apo-belarrak, esne-belarrak, txikoria / mikatzak… // Udako igande batean / makina isilen / konpainian, jarleku horretan bertan eserita // ospatzen dut pala mekanikoarekin / eta hormigoi-makinarekin / nire oinetan den amildegi artifizial hau // zeinetatik hegoaldeko trena igarotzen den. / Ez nuke jakingo esaten Budara / ala Pestera eramango nindukeen.// Parean eguzkia islatzen da / soldadu prusiarren kuartel / zaharrean. Hor, abiazioaren / aitzindari bat globoan / zerura igotzen saiatu zen; / beste batzuk, aurretik, erori egiten ziren. // Aire-boladen preso / zume-adarrez / eta argizariz igurtzitako kotoiz eginiko hegalekin. // Txilioka doa eurocitya Pragara bidean, / aienatu egiten da / hiriburuaren ertzak / pasatu bezain pronto. // Eta oinezkoentzako zubiak / itxita jarraitzen du. / Lehentxeago zerua garbitu egin da eta // zubiaren beste muturraren / gainean begitandu zait / gizonezko bat // argaltxoa zanbuluka / hegal erraldoiekin / eta bibotearekin // arratsaldeko airea euskarri. / Abiadura handiaren / uharak legarra // dardararazten duen bitartean / alanbradaren instalazioaren / irteera bilatu dut. // Egitasmo bat izandakoa oraindik aldarazi ez duten buldozer / eta garabiekin egin dut topo hiriaren alde ibilgarrian. / Urrunetik aditzen dira –Hegoaldeko / geltokian– hurrengo // irteerak. / Matxinsalto bat / jarlekuaren ohol nabarrak / zeharkatzen ari da, // oldartu naiz errailak eta lan / abandonatuak // berreskuratzen ari den / oihan lehorrera // eta arrakala bat begiztatu dut, / mundu zibilerako / itzulbidea. // ...basamitxoleta, urre-botoia, / asunak, txiribitak, / labanda...
HEGOALDEKO GELTOKIA |