TEOGONIA Mundua ez dago prestatuta zuk eta nik bat egin dezagun.
Badakizu, gauzak diren bezalakoak dira eta egon behar duten lekuan daude. Eta horri aurka egitea, legeei aurre egitea, norbere burua jainkotzat hartu eta gizaki legez dugun patu dohakabea manipulatzeak gaztigurik gogorrena dakar: betiereko zigorra.
Onenean, armiarma edo matxinsalto bihurturik biziko zara, edo, umoreko badago, Narciso bihurturik.
Txarrenean, Luzifer izendatuko zaituzte eta munduaren amaiera arte gizonak pairatuko dituen gaitz guztien erantzulea izango zara. Aingeru eroria, belaunikaturik.
Mundua ez dago prestatuta. Jainkoak ez daude prestatuta eta horregatik elkartzen dira mendeku hartzeko eta antolatzen dituzte mekanismoak eta behar besteko tarteak, ingurumenari buruzko logaritmo eta formulak fabrikatzen dituzte, sua eta ura nola, elkar baztertu eta bateraezin bihur gaitezen.
Bai bizkorrak. Bai bizkorrak jainkoak.
Beste mende batzuetako antzinako iragarpenei kasu egin zieten, Prometeo eta Pandora berrien jaiotza iragartzen zuten haiei, Maien sinesteen arabera munduaren akaberaren ondorengo bigarren urtean Daliten matxinada berria iragartzen zuten haiei. Hasieratik zekiten.
Bazekiten zure estrategia napoleonikoak eta nire Dalilaren antzeko dantzek bat egingo balute Olinpoaren zimenduek dar-dar egingo luketela Atonenaren neurriko botere sortzaileaz erdituko ginatekeela, bigarren teogonia abiaraziko genukeela, hamargarren gurutzada, kristau-ikasbideak eta geopolitikak asmatutako kontzeptu guztiak desegingo genituzkeela.
(Santa Teresa dakusat, belauniko porrota onartu beharrean)
Pentsa.
Pangea berrezartzeaz ari natzaizu, Gea eta Urano adiskidetzeko, Kronos erailtzeko gai den botere bati buruz ari natzaizu. Putakume hori behin betiko erailtzeaz ari natzaizu. Hasieratik zekiten.
Bazekiten zure Laokonteren gisako suminak eta nire amazona formek eta suge-mihiak bat egingo balute, eurek porrot egin dezaten aukera oso txiki bat izango genukeela, Ovidio bera berpiztuko litzatekeela gure historia kontatzeko.
Bazekiten zuk eta nik, bai, zuk eta nik talde gisa, AEBetako burtsak eta petrodolarrak krak egitea lortuko genukeela. Eta hori bai ezetz.
Horregatik asmatu zituzten mugak eta hizkuntzak, orduak eta mendeak, eta horregatik jarri zizkiguten faraoiak hondamendiak ekidin eta gu goberna gaitzaten; egunen batean, ustekabean, zuk eta nik bat egingo bagenu ere. Zuk eta nik, talde gisa, ez dezagun sekula bat egin. Horretarako.
Ez horrela begiratu ez nuen nik asmatu. Aspaldi asmatu zuten. Ni etorri nintzenerako horrela zen.
Eta hala ere oraindik bada Parnasoa leherrarazteko aukera ñimiño bat, jainkoen aurka borrokatzeko, bigarren teogonia, eta galdu dezaten. Arranditsuki galdu dezaten.
Lortu genezake. Horixe lortu genezakeela.
Betiko zigortuko bagaituzte eta mundua, oraindik, prestatuta ez badago ere.
TEOGONIA |