AMAK Jonirentzat
Amak bazkarirako egin du deadar eta lasterka zatoz frakak urratuta, patrikak beterik, barrea orduei alamena ematen eskuak presaz garbituta eta zure ahoa samurra da mahaira iristean.
Berandutzen bazara, amak gorde egiten du zure platera bihotzaren ondoan eta irri egiten digu iristear bazina bezala. Bazkaria hoztu egiten da. Gure begiak ateari itsatsita, egingo dituzun bihurrikeriei, belaun txikituei, errautsez husten ari diren patrikei. Baina ez dago itsasorik aski denik zure platerean jitoan den janaria itotzeko.
Amaren ahotsa zuri deika eta deika. Bera zenbat eta isilago, ozenago entzuten dugu bere kumeagatik uluka. Eta hala ere irri egiten digu, eta guk berari, hain baldar.
Amek beti deitzen diete seme-alabei. Bazkalordua pasatu dela dakitenean ere atetik sartzen ikusten dituzte ume barrabanen irribarrearekin. Denok mahaitik altxatu eta gero amek platera ezpaltzen dute bihotzaren kontra eta ama izaten jarraitzen dute hotzari sekula betiko itxarotearen itxaroteaz begiak neke eta zolak higaturik.
AMAK |