46 Bela-haizeek bete bitzat(e) ene nahiak zalantzazko bideak itsasotik eginik. Enbat(a) eta Mendebal haien aurka dakuskit baina Afrikar eta Eki haizeak alde dituzte, et(a) orobat haien lagun Hegoa, eskatzen baitiote apalki Iparrari alde izan dezaten eraunsten duenean.
Suan eltzeak legez Itsasok dirakike berezko kolorea et(a) itxura aldatuz, eta azalduko du gaizkinahi handia gainean jartzen zaion zernahi gauzarentzat; arrain hand(i) eta txikik ihes egingo dute eta gordelekuak bilatuko dituzte hazleku izan duten itsasoar(i) ihesi, lehorrera joango dira salbamen bila.
Erromes guztiak zin bater(a) egingo dute et(a) ezkozko doeak ugari promestuko; izuak argitara erakarriko ditu aitor-entzuleari isildu ezkutuak. Arriskuan inoiz ez zaituztet ahaztuko aitzitik, eskatuko diot, batu gaituen Jaunari, ez dakidan borondatea ibi, eta izango zaitut aurrean aldi oro.
Herioren beldur naiz aldara bainazake zugandik, hiltzen baitu Heriok Amodio; baina ez dut nik uste nire maitasuna goi dezakeen, holako aldaramendu batek. Zure maitasun gezak nau, bai, goganbehartzen, ni hiltzean ez ote nauen ahaztuk(o) arras. Pentsu honek soilik dit plazera eragozten -gu bizirik ez baitut uste gertatuko den-;
ni hilik, gal dezazun maitatze ahalmena, eta hura guztia hira bilaka dadin, eta ni, hertsatua lur hau betan uztera, nire gaitz(a) izango da zu ez begiestea. Oi, Jauna, zergatik ez du Amodiok finik, hartatik hur bakarka bainintzatek(e) egongo? Nekike zenbat nauen nahi zure nahiak datorrenaren fio eta beldur osoki.
Ni naiz maitatzailerik suharrena munduan, Jaunak bizia kendu zion haren ondotik: bizi bainaiz, et(a) ene bihotza ez da doluz heriotza bezainbat haren minarengatik. Amodioaren on edo gaitzera prest naiz baina nire patuak ez narama hartara; guztiz iratzarria, zabaldurik atea, aurkituko nau, baiki, apalki erantzuten.
Garestiena gerta dakidana nahi dut et(a) itxaropen horrek bihotza arintzen dit; ez dut gogoko ene bizia egotea gaitz handitik osorik, aitzitik etor bedi. Orduan fede ez du eman beharko inork Amodiok nigandik at egingo duenaz; haren indarr(a) egintzek agertuko baitute eta ene esanak eginek frogatuko.
Maite, sentitzenago dut ezagutzen baino, zatirik okerrena geldituko zaidala; zutaz soilik dakike zu gabe dagoenak. Dado jokoarena duzu antza, betea.
46 |