GALKORRA “Zure begiak behinola nireekin inoiz nekatzen ez zirenak gaur nahigabez makurtzen dira betazal zalantzation atzean zeren gure maitasuna ahultzen ari baita”.
Eta neskak erantzun zuen: “Gure maitasuna ahuldu arren, gauden berriz ere aintziraren inguru bakartian, biok elkarturik samurraldi honetan non pasioa, ume gaixo nekatua, loak hartzen duen. Zein urrunak diruditen izarrek, eta zein urruna gure lehenengo musuak, eta ai, zein zaharra nire bihotzak!”
Bidean zebiltzan gogoetan orbel iharren artean, eta mutilak, neskaren eskutik helduta, astiro erantzun zion: “Pasioak sarri higatu ditu gure bihotz alderraiak”.
Basoak zeuden inguruan, eta hosto jada horituak ilunantzean jausten ziren meteoro geldoak bailiran, orduan untxi zahar eta herren bat bidean behera jaitsi zen mainguka. Gainean zuen udazkena; eta orain haiek berriz ere gelditu ziren aintziraren inguru bakartian. Jiraturik, mutilak ikusi zuen neskak orbel hil batzuk jaurti zituela, bustiak bere begiak bezala eta isilean batuak bere bular eta ilearen gainean.
“Ai, ez zaitez atsekabetu”, esan zuen mutilak, “zain ditugun beste amodio batzuetarako nekatuta gaudela-eta; gaitzetsi eta maitatu ordu lasaietan, gure aurrean eternitatea datza, gure arimak maitasuna dira eta etengabeko agurra”.
GALKORRA |